जीप दुर्घटना हुँदा एक जनाको मृत्यु, १६ जना घाइते

जीप दुर्घटना हुँदा एक जनाको मृत्यु भएको छ, भने १६ जना घाइते भएका छन्।
नवलपुरको दलदलेबाट पाल्पाको रामपुर जाँदै गरेको लु १ ज ३७१० नम्बरको जीप बुलिङटार गाउँपालिका–६, अत्रौलीमा दुर्घटना हुँदा पाल्पा रामपुर –४ बस्ने २३ वर्षीय अजय विकको घटनास्थलमा नै मृत्यु भएको प्रहरीले जनाएको छ।

उक्त दुर्घटनामा १६ जना घाइते भएका छन्। घाइतेमध्ये ५ जनाको नारायणी सामुदायिक अस्पताल भरतपुरमा र ११ जनाको डेढगाउँमा रहेको स्वास्थ्य केन्द्रमा उपचार भइरहेको छ। घाइतेमध्ये भरतपुरमा उपचाररत बौदिकाली गाउँपालिका घर भएका मोहन लामिछाने र खिमबहादुर मास्केको अवस्था गम्भीर रहेको प्रहरीले जनाएको छ।

प्रहरीका अनुसार जीपमा १७ जना रहेका थिए। जीपका चालक प्रहरीको नियन्त्रणमा रहेका छन्। ब्रेक फेल भएर जीप सडकबाट ५० मिटर तल खसेको बताइएको छ।