गोपाल बिष्ट चिन्तनको गजल -उपहार इस

गजल
उपहार “इस”

पहिला अमृत दिएर, पछाडि विष दिएपछि यस्तै हुन्छ,
मुखमा रामराम, मीठो किसमिस दिएपछि यस्तै हुन्छ।।

पुर्खाको बलिदान बिर्सेर, सहिदको रगत–पसिना बिर्सेर,
घरिघरि ठग–अपराधीलाई बक्सिस दिएपछि यस्तै हुन्छ।।

छानीछानी आफ्नै वरिपरि, आफ्ना–आफ्ना जतिलाई,
पूर्णाङ्क तोडी पच्चीसमा तीस दिएपछि यस्तै हुन्छ।।

समानता, स्वतन्त्रता र न्याय हुने यस्तो व्यवस्था,
तेरो–मेरो अंशबन्डामा न्यायाधीश दिएपछि यस्तै हुन्छ।।

पद र पैसाको आडमा, शक्ति र पहुँचको भरमा सधैं,
भ्रष्ट–दलाल छुटाउन नालिस दिएपछि यस्तै हुन्छ।।

जसले हात दियो, मन दियो र वचन दियो जीवनभर,
उसैलाई पटक–पटक इनाम “इस” दिएपछि यस्तै हुन्छ।।
— चिन्तन, अछाम