गोदावरी नगरपालिकाले पनि ६ लेन सडकमा स्मार्ट सडक बत्ती जडान गर्ने

धनगढीः कैलालीको गोदावरी नगरपालिकाले पनि धनगढी-अत्तरिया ६ लेन सडकमा स्मार्ट सडक बत्ती जडान गर्ने प्रक्रिया थालेको छ। नगरपालिका र नेपाल विद्युत प्राधिकरणको साझेदारीमा बत्ती जडान हुने भएको हो।

चालु आर्थिक वर्षभित्रै ६ लेन सडकको गोदावरी नगरपालिकामा पर्ने गेटादेखि अत्तरियासम्म स्मार्ट सडक बत्ती जडान गर्ने प्रक्रिया अगाडि बढेको नगरप्रमुख वीरेन्द्र भट्टले बताए। उनले असार मसान्तभित्रै गोदावरी नगरपालिकामा पर्ने ६ लेन सडक पनि झिलिमिली हुने बताएका हुन्।
‘यो वर्षको अन्तिमसम्म गोदावरीमा पर्ने ६ लेन सडकमा स्मार्ट सडक बत्ती जोड्ने प्रक्रिया सुरू भएको छ,’ उनले भने, ‘नगरपालिकाले सडक बत्ती जडान गर्न नेपाल विद्युत प्राधिकरणसँग सहकार्य गर्छ।’ नगरप्रमुख भट्टले छिट्टै सबै प्रक्रिया पूरा गरेर काम थाल्ने बताएका छन्।
यसअघि नै धनगढी उपमहानगरपालिकाले भने चौराहादेखि मोहनपुरसम्म स्मार्ट सडक बत्ती जडान गरिसकेको छ। उपमहानगरले विभिन्न चोकमा हाइमास्ट लाइट राख्ने र मेडियन हरियालीयुक्त बनाउने काम गरिरहेको छ। गोदावरी नगरपालिकाले पनि मेडियनमा हरियाली बनाउने जनाएको छ