जनताले महसुस गर्नेगरी काम गरेका छौं नगरप्रमुख चलाउने

आफ्नो कार्यकालमा कम बेरुजु आउने नगरपालिका बनाउने दाबी

काठमाडौं । अछामको पञ्चदेवल विनायक नगरपालिका नगरप्रमुख अम्बिका चलाउनेले दुर्गम ठाउँ भएर काम गर्न चुनौती रहेपनि जनताले महसुस गर्नेगरी काम गरेको दाबी गर्नुभएको छ । उहाँले पहाडमा सडक सञ्जालसम्म जोड्नु पर्ने चुनौती रहेको भन्दै सबै वडा कार्यालयसम्म आउने सडक बिस्तार गरेको बताउनुभयो ।

नेपाली रेडियो नेटवर्कको पालिका बहसका लागि पत्रकार ऋषि धमलासँग संवाद गर्दै नगरप्रमुख चलाउनेले पूर्वाधार निर्माणदेखि स्वास्थ्य र शिक्षालाई केन्द्रमा राखेर काम गरिरहेको बताउनुभयो । उहाँले नगरपालिकाको प्रशासनिक भवन र वडा कार्यालयका भवनहरू निर्माणको अन्तिम चरणमा रहेको जानकारी दिनुभयो ।

पूर्वउपप्रमुखसमेत रहनुभएका चलाउनेले तालागाड जलविद्युत आयोजनामा राज्यले धेरै लगानी गरेको बताउँदै अघिल्लो र यो कार्यकाल गरी नगरपालिकाले नै २ करोड बढी खर्च गरेको दाबी गर्नुभयो । उहाँले निर्माण पहिले नै सम्पन्न भएको आयोजना भएपनि नगरपालिकाले मर्मतमै २ करोड बढी खर्च जिकिर गर्नुभयो । तालागाड मात्र नभएर सबै जलविद्युत आयोजनालाई सञ्चालनमा ल्याउनेगरी मर्मत गरिरहेको बताउनुभयो ।

उहाँले ठेकेदार कम्पनीले समयमा काम सम्पन्न नगर्दा ठाटिखाद–विनायक सडक खण्डको काम बन्न नसकेको बताउनुभयो । यस विषयमा अख्तियारमा पनि छानबिन भइरहेको उहाँको भनाई छ । यो राष्ट्रिय गौरवको योजना भएकोले नगरपालिकाले सम्बन्धित निकायको ध्यानाकर्षण गराएको बताउनुभयो ।

नगरप्रमुख चलाउनेले अघिल्लो कार्यकालमा केही हिसाब फरक परेकाले बेरुजु धेरै देखिएको बताउँदै आफ्नो कार्यकालको पहिलो वर्षको बेरुजु घटेर अछाम कै पहिलो स्थानीय तह हुने दाबी गर्नुभयो ।

फरक प्रसंगमा नेपाली कांग्रेसको सुदूरपश्चिम प्रदेश सहमहामन्त्रीसमेत रहनु भएका चलाउनेले महासमिति बैठकमा विधानमा महिलाको प्रतिनिधित्व गर्ने विषयमा केन्द्रीय तहसम्म बढाउनु पर्ने र व्यवस्थित गर्नुका साथै पदाधिकारीसम्म महिलाको संख्या बढाउनुपर्ने कुराहरू राख्ने बताउनुभयो ।

नेपाली रेडियो नेटवर्कको साभार