धन बहादुर बुढा — अछाम जिल्लाको तुर्माखाँद गाउँपालिका वडा नं. ७, तोषीमा लैंगिक तथा घरेलु हिंसा सम्बन्धी कानुनी सचेतना कार्यक्रम सम्पन्न भएको छ।
समुदायमा बढ्दो लैंगिक तथा घरेलु हिंसा न्यूनीकरण गर्ने उद्देश्यले आयोजना गरिएको उक्त कार्यक्रममा स्थानीय जनप्रतिनिधि, सरोकारवाला निकाय तथा सर्वसाधारणको उल्लेखनीय सहभागिता रहेको थियो।
कार्यक्रमको अध्यक्षता का.ब. अध्यक्ष अम्मरनाथ देवकोटाले गर्नुभएको थियो भने प्रमुख अतिथिका रूपमा तुर्माखाँद गाउँपालिकाकी उपाध्यक्ष तथा न्यायिक समितिकी संयोजक बिमला कुमारी शाहीको उपस्थिति रहेको थियो।
त्यसैगरी कार्यक्रममा उजुरी प्रशासक अधिकृत प्रेमबहादुर बुढा, न्यायिक समिति सदस्य सुनिता शाही, गाउँ कार्यपालिका सदस्य तथा न्यायिक समिति सदस्य झंकरबहादुर नेपाली, नेपाली कांग्रेसका बर्दीप्रसाद जैशी, नेकपा (एमाले) का खडकबहादुर कुटमाल, नेकपा प्रतिनिधि भवानीप्रसाद जैशी तथा निवर्तमान अध्यक्ष हिरशचन्द्र देवकोटालगायतको सहभागिता रहेको थियो।
कार्यक्रममा सहभागीहरूलाई लैंगिक तथा घरेलु हिंसासम्बन्धी विद्यमान कानुनी व्यवस्था, पीडितले प्राप्त गर्ने सेवा तथा न्यायिक प्रक्रियाबारे विस्तृत जानकारी प्रदान गरिएको थियो। साथै, समुदाय स्तरमै सचेतना अभिवृद्धि गर्दै हिंसा विरुद्ध सबै एकजुट हुनुपर्नेमा विशेष जोड दिइएको थियो।
कार्यक्रमको सञ्चालन स्वास्थ्य चौकीका अ.हे.ब. भीमबहादुर थापाले गर्नुभएको थियो।
स्थानीयवासीहरूको सक्रिय सहभागिताले कार्यक्रम प्रभावकारी बनेको आयोजकले जनाएको छ। यस्तो कार्यक्रमले समुदायमा सकारात्मक सन्देश प्रवाह गर्दै हिंसा न्यूनीकरणमा सहयोग पुग्ने अपेक्षा गरिएको छ।
Discussion about this post