काठमाण्डौ – प्रधानमन्त्री केपी शर्मा ओलीले विगतमा नाकाबन्दीको बेला त्यसको डटेर सामना गर्दा सरकार नै ढलेको जस्तै अहिले पनि षड्यन्त्र भएको दाबी गर्नुभएको छ ।

सोमबार दिउँसो देशवासीका नाममा सम्बोधन गर्दै ओलीले विगतमा राष्ट्रियताका पक्षमा काम गर्दा सरकार ढलेको र अहिले पनि राष्ट्रियताकै पक्षमा लाग्दा विगतकै पात्रले आफूलाई अफ्ठेरोमा पारेको बताउनुभयो ।

‘परिस्थिति र समय फरक भए पनि पात्र यिनै हुन्, कतिपय नेताहरु नेपाललाई अनन्त अस्थिरतातर्फ धकेल्न लागिपरेको प्रष्ट हुन्छ’, ओलीले भन्नुभएको छ ।

तत्कालीन माओवादी र एमाले एकजुट भएर चुनाव लडेको तर नतिजापछि आफूलाई खेद्ने, सरकार बनाउनै नदिने, विभिन्न पदमा आफ्ना मान्छे चाहियो भन्दै असहयोग गर्ने गरेका कारण आफू समस्यामा परेको ओलीको भनाइ छ ।

आफ्ना पार्टीका नेताहरू प्रतिपक्षी दलभन्दा पनि एक कदम अघि बढेर विरोध र अवरोधमा लाग्दा आफूलाई काम गर्न समस्या भएको उहाँको भनाइ छ ।