चौरपाटी, अछाम — २०८२ जेठ १४ _जिल्ला प्रहरी कार्यालय अछाम र सामाजिक विकास कार्यालय अछामको संयुक्त आयोजनामा चौरपाटी गाउँपालिका–७ स्थित श्री शान्ति देवी माध्यमिक विद्यालयमा आत्महत्या तथा लागू औषध दुर्व्यसन न्यूनिकरणसम्बन्धी एकदिने सचेतनामूलक कार्यक्रम सम्पन्न गरिएको छ।
कार्यक्रम जिल्ला प्रहरी कार्यालय अछामका कार्यालय प्रमुख प्रहरी नायव उपरीक्षक ईश्वरी प्रसाद भण्डारीको प्रमुख आतिथ्यतामा सम्पन्न भएको थियो। कार्यक्रमको अध्यक्षता सामाजिक बिकाश कार्यलय अछामका प्रमुख डम्बर बहादुर रावलले गर्नुभएको थियो ।भने चौरपाटी–७ का वडा अध्यक्ष ललित बोगटी र विद्यालयका प्रधानाध्यापक प्रेम बहादुर बोगटी विशेष आतिथ्यका रूपमा सहभागी हुनु भएको थियो।
समुदाय–प्रहरी साझेदारी कार्यक्रम अन्तर्गत आयोजित कार्यक्रममा प्रमुख अतिथि भण्डारीले आत्महत्यासम्बन्धी विविध पक्षहरू — जस्तै आत्महत्या गर्ने व्यक्तिका मनोविज्ञान, आत्महत्या संकेत चिन्ने तरिका, जोखिम घटाउने उपाय, कानुनी पक्ष, छाउपडी प्रथा विरुद्ध प्रहरीको भूमिका र प्रयासहरू लगायतका विषयमा श्रव्यदृश्य सामग्रीको माध्यमबाट प्रस्तुति दिनुभयो।
त्यस्तै, लागू औषध दुर्व्यसन सम्बन्धी जानकारी दिँदै नेपालमा प्रचलित लागू औषध, अछाममा पाइने किसिमका लागू औषध, प्रयोग गर्ने प्रमुख कारण, दुर्व्यसनीको लक्षण, दण्ड–सजाय र नियन्त्रण उपायहरूबारे जानकारी गराइएको थियो।
कार्यक्रममा विद्यालयका कक्षा ९, १० र ११ का ६१ जना विद्यार्थीहरूसहित शिक्षक, अभिभावक तथा जनप्रतिनिधिहरूको सक्रिय सहभागिता रहेको थियो।
सहभागीहरूका अनुसार कार्यक्रम अत्यन्त उपयोगी र ज्ञानवर्धक भएको प्रतिक्रिया दिएका छन्।
Discussion about this post