सुदूरपश्चिम प्रदेशका मुख्यमन्त्री त्रिलोचन भट्टलाई कोरोना पुष्टि भएको छ । सेती प्रादेशिक अस्पतालको प्रयोगशालामा वैशाख २७ गते पीसीआर परीक्षण गर्दा उनीमा कोरोना पुष्टि भएको हो । मुख्यमन्त्रीको निजी सचिवालयका अनुसार उनको स्वास्थ्य अवस्था भने सामान्य रहेको छ। उनको होम आइसोलेसनमै उपचार भइरहेको छ ।
यस्तै सेती प्रादेशिक अस्पताल धनगढीले कोरोना बिरामीहरुको लागि शय्या संख्या विस्तार गरेको छ । कोरोना अस्थायी अस्पतालबाट ५० शय्याबाट उपचार सेवा सुरु गरेको अस्पतालले अब भने विस्तार गरेर १३५ शय्या संख्या पुर्याएको हो ।
अस्पतालका सूचना अधिकारी दिलिप कुमार श्रेष्ठका अनुसार अस्पतालले गत वर्षदेखि ५० शय्याको अस्पताल सञ्चालनमा ल्याएको हो । त्यसैमा ११ शय्याको आइसीयू थप गरेर ६१ शय्या पुर्याएको सूचना अधिकारी दिलिप श्रेष्ठले बताए । बिरामीको चाप क्रमिक रुपमा बढ्दै गएपछि अस्पतालले केही दिन अघि मात्रै थप ७४ शय्या थप गरेको हो ।
अस्पतालले सर्जिकल वार्ड र आकस्मिक कक्षलाई हाल कोरोना कोरोना वार्ड बनाइएको छ। सर्जिकल वार्डमा ४० र आकस्मिक वार्डमा ३४ शय्या राखिएको हो । हाल सेती प्रादेशिक अस्पतालमा १११ जना बिरामी भर्ना गरिएको छ। जसमध्ये १ जनालाई भेन्टिलेटरमा, १६ जनालाई आईसीयूमा र बाँकीलाई अक्सिजन सहयोगमा राखिएको बताइएको छ ।
Discussion about this post