धनगढीमा विद्यार्थी कुटपिटमा संलग्न १२ जना पक्राउ

धनगढीः धनगढीमा कुटपिट गरेको आरोपमा १२ जना पक्राउ परेका छन्।

जिल्लाको धनगढी उपमहानगरपालिका वडा नम्बर १९ मा आइतवार एसईई परीक्षा दिएर घर फर्किरहेका चार जना विद्यार्थीमाथि कुटपिट गरेको आरोपमा प्रहरीले उनीहरुलाई पक्राउ गरेको हो।

धनगढी उपमहानगरपालिका–१९ को फूलबारी माध्यमिक विद्यालयबाट एसईई परीक्षा दिएर घर फर्किरहेका चार जना विद्यार्थीलाई कुटपिट गर्ने सोही ठाउँका १२ जना युवालाई पक्राउ गरिएको हो।

पक्राउ पर्नेमा धनगढी उपमहानगरपालिका वडानम्बर १८ बस्ने १९ वर्षीय विराज बिसी, २२ वर्षीय किसन खड्का, २० वर्षीय रविन्द्र खड्का, सन्तोष दवाडी, जनक बोहरा, आर्यन थापा, अशोक विक, प्रविन रानामगर, अवि विक, सुजना कोली, सुरज परियार र कृष्ण सिकेलाई पक्राउ गरेर घटनाबारे अनुसन्धान भइरहेको जिल्ला प्रहरी कार्यालय कैलालीका प्रहरी निरीक्षक खगेन्द्र साउँदले बताए।

पक्राउ गरिएका उनीहरुमाथि अदालतबाट म्याद थपेर अनुसन्धान भइरहेको प्रहरीले जनाएको छ।

फूलबारी माध्यमिक विद्यालयमा एसईइ दिन गएका धनगढी उपमहानगरपालिका–१४ का चार जना विद्यार्थीलाई ती १२ जनाको समूहले आक्रमण गरेको थियो। आक्रमणबाट रमेश भण्डारी, जीवन भण्डारी, क्रीस मगर र सागर भण्डारी घाइते भएका थिए।