माफी माग्दै पत्रकारमाथि जाई नलाग्ने प्रतिबद्वतापछि छुटे अवस्थी

धनगढीः धनगढीका पत्रकार टेकसिंह धामीलाई टाउको फुटाइदिने धम्की दिने नेवि संघका कार्यकर्ता ओमप्रकाश अवस्थी थुनामुक्त भएका छन्। शनिबार साँझ जिल्ला प्रहरी कार्यालयमा पत्रकार महासंघका प्रदेश अध्यक्ष योगेश रावल, जिल्ला अध्यक्ष हिमालय जोशीसमेतका पत्रकार र नेवि संघका अध्यक्ष मनिष कुँवरसहितका नेताहरूको छलफलमा अवस्थीले गल्ति गरेको भन्दै माफी मागेपछि थुनामुक्त भएका हुन्।

जिल्ला प्रहरी कार्यालयकाअनुसार पत्रकार महासंघ कैलालीका अध्यक्ष जोशीको रोहबरमा लिखित रूपमा समेत अवस्थीले माफी माग्दै अब धाक, धम्की तथा पत्रकार धामीलाई क्षति हुने कुनै गतिविधि नगर्ने प्रतिबद्वता जनाएका छन्। जिल्ला प्रहरी कार्यालयले अवस्थीलाई शुक्रबार पक्राउ गरेको बताएपनि पत्रकार धामीलाई खबर नगरेर हाजिरी जमानीमा छाडेको थियो।

पत्रकार महासंघको नेतृत्वमा जिल्ला प्रहरी कार्यालय पुगेर शनिबार बिहान एसपी देवेन्द्र पाललाई भेट्दै पत्रकारहरूले धम्की दिने व्यक्तिलाई उन्मुक्ति दिन खोजेको भन्दै विरोध जनाएपछि अवस्थीलाई पुनः थुनामा राखिएको थियो। नेवि संघका अध्यक्ष कुँवरसहितका नेताले अवस्थीले गल्ती गरेको र अबदेखि त्यस्तो गल्ती नगर्ने भन्दै छलफलका आग्रह गरेपछि साँझ विद्यार्थी नेता र पत्रकारहरू छलफलमा जुटेका थिए।