सुदूरपश्चिमका ११.८ प्रतिशत महिलाको नाममा मात्र घरजग्गा

धनगढीः सुदूरपश्चिम प्रदेशमा न्यून संख्याका महिलाको नाममा मात्र घर–जग्गा रहेको पाइएको छ।

राष्ट्रिय जनगणना २०७८ को नतिजा अनुसार प्रदेशमा ११ दशमलव ८ प्रतिशत महिलाको नाममा मात्र घर जग्गा रहेको पाइएको हो। जनगणना नतिजाअनुसार परिवार संख्याका आधारमा महिलाको नाममा घरजग्गा रहेको प्रदेशमध्ये सबैभन्दा कम सुदूरपश्चिम प्रदेशमा देखिएको छ। सुदूरपश्चिमका ८६ दशमलव ४ प्रतिशत महिलाको नाममा घर जग्गा छैन। प्रदेशमा एक दशमलव ८ प्रतिशत महिलाको उल्लेख गरिएको छैन्।

सुदूरपश्चिममा ११ दशमलव ८ प्रतिशत परिवारका महिलाको नाममा मात्र घरजग्गा रहेको तथ्याँकले देखाएको छ। सबैभन्दा बढी कोशी प्रदेशमा २८ दशमलव ५ प्रतिशत परिवारका महिलाको नाममा घरजग्गा छ।

सुदूरपश्चिममा पाँच लाख ७६ हजार ७ सय ७२ परिवार संख्यामध्ये महिलाको नाममा घर भएको संख्या तीन हजार नौ सय ३१ (शुन्य दशमलव ७ प्रतिशत) छ। जग्गा मात्र भएको महिलाको संख्या २७ हजार ११३ ( ४ दशमलव ७ प्रतिशत) छ।

त्यसैगरी घरजग्गा दुबै भएको परिवार संख्या ३६ हजार ७५३ (६ दशमलव ४ प्रतिशत) रहेको तथ्यााकमा उल्लेख छ। सुदूरपश्चिम प्रदेशमा ४ लाख ९८ हजार ५३० (८६ दशमलव ४ प्रतिशत) परिवारमा महिलाको नाममा घरजग्गा छैन। २०७८ को जनगणनाअनुसार सुदूरपश्चिम प्रदेशमा २६ लाख ९४ हजार ७८३ संख्या पुगेको छ।