धनगढीका व्यापारीले घेरे राष्ट्र बैंक

धनगढीः धनगढीका व्यापारीले राष्ट्र बैंक घेरेका छन्। व्यापारीहरुको दैनिक आन्दोलनका कार्यक्रम अन्तरगत बुधवार उनीहरुले राष्ट्र बैंक धनगढी घेराउ गरेका हुन्। बैंक तथा वित्तीय संस्थाहरुले मनोमानी ब्याजदर वृद्धि गरेको भन्दै कैलालीका व्यापारीहरु मंगलवार बैंकहरुमा धर्ना दिएका हुन्।

पाँच दिनसम्म हुने आन्दोलनमा प्रदेशमा सबै जिल्ला तथा नगर उद्योग वाणिज्य संघको ऐक्यबद्धता छ। सुदूरपश्चिमका व्यवसायीले १८ गते बिहीवार कुनै पनि बैंकमा रकम जम्म नगर्ने र माग सम्बोधन नभए चैत १ गतेबाट थप आन्दोलन चर्काउने चेतावनी व्यापारीहरुको छ।

सरकारले व्यवसायीलाई सडक आन्दोलन गर्न बाध्य बनाएको उनीहरुले बताउने गरेका छन्। कैलाली उद्योग वाणिज्य संघले फागुन ५ गतेदेखि बैंकको व्याजदर विरुद्ध आन्दोलन थालेको हो। बैंकहरूले दोब्बर व्याज बढाएर बैंङ्किङ आतङ्क मचाएको व्यवासायीको आरोप छ। बैंकहरूले कायम गरेको चर्को ब्याज व्यवसायीको मात्रै समस्या नभएर यसले सम्पूर्ण उपभोक्तालाई महङ्गीको मारमा पारेको उनीहरुको गुनासो छ। बैंकहरूले कालोवजारी गरिरहेको सुदूरपश्चिमका उद्योगी व्यवसायीको आरोप छ। राष्ट्र बैंकले जारी गरेको चालु पुँजी कर्जा मार्ग दर्शन खारेज हुनुपर्ने व्यवसायीले माग गर्दै आएका छन्।

राष्ट्र बैंकको मौद्रिक नीति परिमार्जन गर्नुपर्ने माग देशभर उठेको छ। व्यवसायीले अघि सारेका मागप्रति कुनै सुनुवाई नभए चैत १ गतेबाट कडा आन्दोलन गर्न बाध्य हुने चेतावनी कैलाली उद्योग वाणिज्य संघले दिएको छ।

सुदूरपश्चिमका व्यवसायीहरूले सोमवारबाट शुक्रवारसम्म दैनिक ११ बजेसम्म सम्पूर्ण व्यापार व्यवसाय बन्द गर्ने छन्।