संघीयताको विकल्प छैन,संघीयता मास्न खोज्नेहरु आफै समाप्त हुनेछन् :

काठमाडौं।जनता समाजवादी पार्टी (जसपा) नेपालका अध्यक्ष उपेन्द्र यादवले जुनकुनै हालतबाट पनि संघियताको रक्षा गर्नुपर्ने बताउनुभएको छ । जनकपुरधाममा आज आयोजित एक कार्यक्रममा बोल्दै उहाँले संघीयता मधेशी समुदायसहित पछाडि परेका वर्गको भविष्यसँग गाँसिएकाले यसको रक्षाको विकल्प नरहेको बताउनुभएको हो ।

उहाँले अझै पनि खस शासकहरुले संघीयता नचाहेको चर्चा गर्दै मुलुकलाई एकात्मक प्रणालीमा लग्न खोजेको आरोप लगाउनुभयो। तर, त्यस्तो अवस्था आउन नदिइने उहाँको दाबी छ । उहाँले भन्नुभयो, “संघीयताको विकल्प एकात्मक प्रणाली हुँदैन, संघीयतालाई समाप्त पार्न खोज्नेहरु आफै समाप्त भएर जानेछन्।” उहाँले भन्नुभयो, “हामी चुक्नु हुँदैन। हामी चुक्यौं भने संघीयता र गणतन्त्र दुवै धरापमा पर्छ।”

वर्तमान सरकारको भविष्य संघीय निजामती ऐन पारित गरी प्रदेशको कर्मचारीतन्त्र स्थापित गर्नु र प्रहरी समायोजन गरी प्रदेश प्रहरीको गठन गर्ने यी दुई विषयमा टिकेको बताउनुभयो । यी दुई वटा कुरामा सरकार गम्भीर नभए सरकारको भविष्य खतरामा पर्ने उहाँको भनाइ छ ।