अछामका योजनाहरूको अनुगमन तीव्र, जिसस अछामद्वारा पञ्चदेवल विनायकमा स्थलगत अनुगमन

विनायक,अछाम । जिल्ला समन्वय समिति ९जिसस० अछामले जिल्ला भित्र सञ्चालनमा रहेका विकास योजनाहरूको अनुगमन कार्यलाई तीव्रता दिएको छ। उपप्रमुख दानमती बम शाहीको संयोजकत्वमा मङ्गलवार पञ्चदेवल विनायक नगरपालिकामा निर्माणाधीन योजनाहरूको स्थलगत अनुगमन गरिएको हो।

समितिका अनुसार पञ्चदेवल क्याम्पसमा निर्माण भइरहेको भवन, विद्यामन्दिर नमुना माविको खेलमैदान, कुइका स्वास्थ्य चौकी, तथा निर्माण कार्य अवरुद्ध भएको कालेकाँडाको वडा कार्यालय लगायतका योजनाहरूको अनुगमन गरिएको हो।

अनुगमनका क्रममा योजनाहरू प्राविधिक स्टिमेट अनुसार सम्पन्न भएका छन् वा छैनन् भन्ने, कामको गुणस्तर, सामग्रीको प्रयोग लगायतका पक्षहरूबारे नाप जाँच गरिएको नायव सुब्बा अमर जैशीले जानकारी दिए।

योजनाको समग्र प्रगति सन्तोषजनक रहेको जसमा कार्यरत सब इन्जिनियर बागेश्वरी जैशीले बताइन्। उनका अनुसार पञ्चदेवल विनायक नगरपालिकाभित्रका अधिकांश पूर्वाधार योजनाहरू निर्धारित मापदण्ड अनुसार अगाडि बढिरहेका छन्।

अनुगमन टोलीमा जिसस उपप्रमुख शाही, नायव सुब्बा जैसी, सब इन्जिनियर बागेश्वरी जैसी, पञ्चदेवल विनायक नगरपालिका सब इन्जिनियर गोकर्ण प्रसाद तिमिल्सैना, तथा पत्रकार महासङ्घ सुदूरपश्चिम प्रदेश समिति सदस्य दिनेश केसीको सहभागिता रहेको थियो।

जिसस अछामले यसअघि रामारोशन गाउँपालिका, कमलबजार नगरपालिका र तुर्माखाँद गाउँपालिकाका योजनाहरूको अनुगमन गरिसकेको र अब जिल्लाका सबै स्थानीय तहमा पुगेर अनुगमन गरिने जानकारी दिएको छ।