पञ्चदेवल विनायकमा पालिका स्तरीय बाल भेला सम्पन्न, बालबालिकाबाट १५ लाखको योजना प्रस्ताव

पञ्चदेवल विनायक नगरपालिका- मा नगर बाल सञ्जालको आयोजनामा र आस्था नेपाल, वर्ल्ड भिजन इन्टरनेशनल नेपाल तथा महिला हिंसा विरुद्ध अन्तर धार्मिक राष्ट्रिय सञ्जाल नेपालको सहयोगमा पालिका स्तरीय बाल भेला सम्पन्न भएको छ।

बाल अधिकार, सुरक्षा र समग्र विकासका विषयमा सचेतना जगाउने उद्देश्यले सम्पन्न भेलामा नगरका सबै वडाका बालबालिकाको सक्रिय सहभागिता रह्यो। नगर बाल सञ्जाल अध्यक्ष रिता ढकालको अध्यक्षतामा सुरु भएको कार्यक्रममा कार्यबाहक नगरप्रमुख कृपा बहादुर धामी प्रमुख अतिथि रहनुभएको थियो।

कार्यक्रममा प्रमुख प्रशासकीय अधिकृत डम्बर बहादुर थापा, स्वास्थ्य शाखाका प्रतिनिधि लक्ष्मी कान्त बजगाईं, महिला तथा बालबालिका शाखा प्रमुख हंस राज अधिकारी, आस्था नेपालका फिल्ड अधिकृत दिल बहादुर शाहीलगायत सरोकारवालाको उपस्थिति थियो।

भेलामा बालबालिकाले बाल विवाह, मोबाइलको दुरुपयोग, लागू पदार्थ दुर्व्यसन र छाउपडी प्रथालाई प्रमुख समस्या पहिचान गर्दै प्राथमिकताका आधारमा योजना निर्माण गरेका थिए। उनीहरूले कुल १५ लाख १५ हजारको लागत अनुमानसहितको कार्यक्रम प्रस्तुति गर्दै अभिभावक, विद्यालय र स्थानीय सरकारसँग सहकार्यमा कार्यान्वयनको माग गरेका छन्।

कार्यक्रममा चित्रमार्फत सुरक्षित–असुरक्षित स्थानको पहिचान, मन पर्ने–नपर्ने ठाउँको विवरण, शरीर नक्साङ्कन र भविष्यको बालमैत्री नगरको परिकल्पना प्रस्तुत गरिएको थियो।

भेलामार्फत नगर बाल सञ्जालको पुनर्गठन गर्दै श्रृजना अधिकारीलाई अध्यक्ष चयन गरिएको छ।

कार्यक्रममा सरोकारवालाहरूले बालबालिकाको हक सुनिश्चित गर्दै उनीहरूको भविष्य निर्माणमा सहकार्य गर्ने प्रतिबद्धता जनाए।

बाल सञ्जाल सदस्य संगिता तिमिल्सेनाको सञ्चालनमा सम्पन्न भएको सो कार्यक्रमले बाल आवाजलाई स्थानीय तहमा नीति निर्माणसम्म पुर्‍याउने आधार तयार गरेको छ।