राजसंस्थाको बहस, एमाले नेताहरुले के भने?

काठमाडौँ – नेपालका सत्ताधारी र विपक्षी दलहरुले राजसंस्थाप्रतिको बहसलाई फेरि एकपटक राजनीतिको केन्द्रमा ल्याएका छन् ।अहिलेको राजनीतिक प्रणालीप्रति दिक्दारी जनाएर नेताहरुले राजसंस्थाप्रतिको बहसलाई कुनै न कुनै रुपमा स्थान दिँदै आएका थिए ।

अब त दलका शीर्ष नेताहरु गणतन्त्रको राष्ट्रपति भन्दा राजा नै ठीक भन्न थालेका छन् । बिहीबार माओवादी केन्द्रका अध्यक्ष पुष्पकमल दाहाल प्रचण्डले अहिलेको राष्ट्रपति संस्था भन्दा त उहिलेका राजाहरुकै शान थियो भनेपछि राजससंस्थाप्रतिको बहस फेरि सतहमा आएको हो ।

प्रचण्डको यो अभिव्यक्तिलाई सत्तारुढ नेकपा एमालेका नेताहरुले प्रतिवाद गरेका छन् । एमालेका प्रभावशाली नेता तथा लुम्बिनी प्रदेशका मुख्यमन्त्री शंकर पोखरेलले माओवादी केन्द्रका अध्यक्ष प्रचण्डबाट पूर्व राजालाई गुहार्ने काम पनि पूरा भएको आरोप लगाउनुभयो ।

बिहीबार सम्पादकहरुसँगको अन्तरक्रियामा अध्यक्ष प्रचण्डले ‘अहिलेको राष्ट्रपति संस्थाभन्दा त उतिबेलाका राजा नै ठीक’ भन्दै अभिव्यक्ति दिनुभएको हो ।प्रचण्डले राजा नै ठीक भनेर दिएको अभिव्यक्ति गणतन्त्रकै लागि खतरनाक रहेको एमाले अध्यक्ष समेत रहनुभएका प्रधानमन्त्री केपी शर्मा ओलीको भनाई छ ।

उहाँले अहिले राष्ट्रपतिलाई चिथोर्ने प्रतिस्पर्धा चलेको टिप्पणी गर्नुभयो । रिसाएको बिरालोले खाँबो चिथोर्छ भनेझैँ राष्ट्रपतिलाई जसले गाली गर्न सक्छ, त्यो ठूलो हुने प्रतियोगिता नै चलेको उहाँले बताउनुभयो ।

विपक्षीहरु राष्ट्रपति भन्दा त राजा नै ठीक रहेको भन्नेसम्म पुगेको प्रधानमन्त्रीले बताउनुभयो ।विपक्षी गठबन्धनले असभ्य समाज बनाउन चाहेको प्रधानमन्त्रीको आरोप छ । उहाँले २० मन्त्रीहरु पदमुक्त भएको विषयमा सर्वोच्च अदालतले सेटिङमा फैसला गरेको त होइन भन्ने प्रश्न पनि उठाउनुभयो ।

सर्वोच्च अदालतले पछिल्लो पटक थपिएका मन्त्रीहरुलाई काम गर्न रोक लगाउनु अघिल्लो दिन नै प्रचण्डले धादिङमा बोलेको भन्दै उहाँले सेटिङको आशंका गर्नुभएको हो ।भोलिपल्ट कुखुरो हराउनु छ भने अघिल्लो दिन नै धादिङमा स्याल कसरी करायो भन्ने विषय गम्भीर रहेको प्रधानमन्त्रीको भनाई छ ।

विपक्षी गठबन्धनका नेताहरुको सक्रियताले गणतन्त्र नै खतरामा परेको आरोप सत्तापक्षले लगाइरहेको छ भने यही आरोप सत्तापक्षले विपक्षी गठबन्धनलाई लगाइरहेको छ ।दुवै पक्षले प्रणाली उल्टाउन खोजेको आरोप एकअर्कालाई लगाइरहेका बेला राजसंस्थाप्रतिको बहसले स्थान पाएको हो । राजनीतिक विश्लेषक डा। सुरेन्द्र केसीले नेताहरुका अभिव्यक्ति सुन्दा राजनीतिक परिस्थितिमा फेरबदल गर्ने योजना बनिरहेको संकेत दिइरहेको बताउनुभयो ।

दलका नेताहरुले राजसंस्थालाई प्रेत संस्थाको रुपमा व्याख्या गर्ने गरेका थिए । सामान्य नेपाली नागरिकको हैसियतमा रहेका पूर्व राजपरिवारका सदस्यहरु होटेलमा गएर रमाइलो गरेको विषयमा प्रचण्डले सार्वजनिक मञ्चबाट गम्भीर आपत्ति प्रकट गरेको विषयले चर्चा पाएको थियो ।