“हुन देऊ विष वर्ष पुरा, नगर विहेका कुरा” भन्ने सन्देशसहित बालविवाह विरुद्धको अभियान चलाउँदै श्री जैसरा देवी स्मृति युवा क्लब को आर्थिक सहयोगमा श्री मेनका मा.वि. र कामेश्वरी मा.वि. का विद्यार्थीहरूलाई शैक्षिक सामग्री वितरण तथा SEE परीक्षाको शुभकामना दिँदै विदाई कार्यक्रम सम्पन्न भएको छ।
कार्यक्रमका क्रममा ५३ जना विद्यार्थीहरूलाई ज्यामिती बक्स, डप्टी, सिसाकलम, साथै १०६ वटा डटपेन वितरण गरिएको थियो।
समाज विकासमा क्लबको भूमिका
समाजमा आर्थिक र सामाजिक विकासका पूर्वाधारहरू अपूर्ण रहेका कारण आमजनजीवनमा परिवर्तन आउन सकेको छैन। यस अवस्थामा युवाहरू नयाँ सोचसहित संगठित भई सामाजिक जागरण ल्याउने, परम्परागत ज्ञान तथा सीपलाई आधुनिकिकरण गर्दै शिक्षा, स्वास्थ्य, कृषि, वातावरण, रोजगारी, खेलकुद जस्ता क्षेत्रको विकासमा योगदान पुर्याउने लक्ष्य क्लबले लिएको छ।
क्लबका अध्यक्षका अनुसार, शोषण, उत्पीडन, असमानता तथा समाजमा व्याप्त विकृतिहरू हटाउँदै, लोकतन्त्र, सुशासन तथा सामाजिक न्यायको प्रवर्द्धन गर्दै राष्ट्रिय एकता कायम गर्न क्लबले निरन्तर क्रियाशील रहने प्रतिबद्धता व्यक्त गरेका छन्। साथै, भविष्यमा अग्रजहरूको सुझाव र साथ लिएर थप प्रभावकारी कार्यक्रम अघि बढाइने बताइएको छ।
Discussion about this post