धनगढीः नेपाली काँग्रेसको सुदूरपश्चिम दलको बैठक बस्ने भएको छ। सुदूरपश्चिमका मुख्यमन्त्री तथा काँग्रेस संसदीय दलका नेता कमलबहादुर शाहले दलको बैठक बोलाएका हुन्। मुख्यमन्त्री शाहले बिहान १० बजे प्रदेश संसदीय दलको कार्यालय, धनगढीमा बैठक बोलाएका हुन्।
दिउँसो १ बजेको प्रदेश सभाको बैठकमा विश्वासको मत लिने तयारीमा मुख्यमन्त्री शाह छन्। संविधानको धारा १६८ (३) अनुसार प्रदेश सभामा सबैभन्दा ठुलो दलको हैसियतमा काँग्रेस संसदीय दलका नेता कमलबहादुर शाहको नेतृत्वमा प्रदेश सरकार गठन गरिएको थियो।
माघ २६ गते गठित सरकारले ३० दिनभित्र विश्वासको मत लिनुपर्ने संवैधानिक व्यवस्था छ। विश्वासको मतका लागि सुदूरपश्चिममा २७ मत आवश्यक हुन्छ। गठबन्धनमा रहेका आठ दलमध्ये सुदूरपश्चिममा काँग्रेससँग १९, नागरिक उन्मुक्तिका ७, नेकपा एकीकृत समाजवादीका ४ सांसद छन्। माओवादीका ११ प्रदेश सभा सदस्य छन्। एक जना स्वतन्त्र सांसदको पनि शाह नेतृत्वको सरकारलाई नै साथ छ।
माओवादी केन्द्र संसदीय दलका नेता खगराज भट्टले र नागरिक उन्मुक्ति पार्टीका अध्यक्ष रञ्जिता श्रेष्ठ चौधरीले लिखित सहमति मागेका छन्। माओवादीले आइतवार बिहान ११ बजे दलको बैठक बोलाएको छ। माओवादीको बैठक सुरु हुनु भन्दा अगाडी काँग्रेस दलको बैठक बस्ने भएको हो।
नागरिक उन्मुक्तिले दुई मन्त्रालय, २ राज्यमन्त्री र दुई संसदीय समितिको सभापति माग गर्दै आएको छ।
Discussion about this post