धनगढीः सुदूरपश्चिममका मुख्यमन्त्री कमलबहादुर शाहले फागुन २१ मा विश्वासको मत लिने तयारी गरे पनि त्यसबारे अन्तिम टुंगो भने लागेको छैन्। विश्वासको मत लिन सरकारको नेतृत्व गरिरहेको कांग्रेससहित सबै दलका नेताहरू केन्द्रको निर्देशनको पर्खाइमा छन्।
राष्ट्रपति निर्वाचनलाई केन्द्रित गरेर शुक्रबार गठबन्धनमा रहेका दलका सांसदहरूको शुक्रबार गोदावरीमा भएको छलफलमा विश्वासको मत कहिले लिने सवालमा गहन रुपमा छलफल तथा निर्णय नभएको प्रदेश सभा सदस्यले बताएका छन्। मुख्यमन्त्रीले लिने विश्वासको मतका विषयमा ठोस रुपमा छलफल भएको छैन्।
गठबन्धनभित्रका सांसदहरूलाई सहजीकरण गर्न आएका कांग्रेस सहमहामन्त्रीसमेत रहेका संघीय सांसद बद्रीप्रसाद पाण्डेले भने, ‘केन्द्रमा शीर्ष नेताहरूबीच छलफल भएर त्यस विषयमा निर्देशन आउला।’ मुख्यमन्त्रीले विश्वासको मत लिइसक्नुपर्ने अन्तिम समय सीमा फागुन २६ गते हो।
मुख्यमन्त्री शाहले भने आइतबार विश्वासको मत लिने भन्दै शुक्रबार दिउँसो प्रदेशसभा सचिवालयमा पत्र दर्ता गराएका छन्। तर आइतबार नै विश्वासको मत लिने÷नलिने भन्ने टुंगो लागिनसकेको सांसदहरूले बताए। २१ गते विश्वासको मत नलिए समय व्यवस्थापन गर्न समस्या हुने बताइएको छ। गठबन्धनका सांसदहरू सबैले राष्ट्रपति निर्वाचनका लागि २२ गते काठमाडौं जानैपर्ने भएकाले समय व्यवस्थापन गर्न कठिन हुने देखिएको हो।
सरकारले विश्वासको मत पाउनेमा भने समस्या नभएको भन्दै मुख्यमन्त्री शाहले आइतबार नभए सोमबार बिहानसम्म भए पनि विश्वासको मत लिनेबारे छलफल भइरहेको बताए। ७ सांसद रहेको नागरिक उन्मुक्तिले तीन मन्त्री, दुई राज्यमन्त्री र दुई वटा संसदीय समितिमा सभापति आफ्नो पार्टीले पाउनुपर्ने दाबी गरेको छ।
Discussion about this post