साता नवित्दै तीन युवकले ज्यान गुमाए-अछाम टुडे

बाजुरा जिल्लाको गौमुल गाउँपालिकाको केन्द्र घटमुनाबाट घर जादै गर्दा बीच बाटोमा लडेर एक जनाको सोमबार मृत्यु भएको छ । मृत्यु हुनेमा सोही गाउँपालिका–१ दुर्गाली घर भएका अन्दाजी ३० वर्षीय कन्तरो रोकाया रहेको जिल्ला प्रहरी कार्यालय बाजुराका प्रहरी निरिक्षक तथा सूचना अधिकारी बलेन्द्र नाथले जानकारी दिएका छन् । उनले दिएको जानकारी अनुसार गाउँपालिकाको केन्द्र घटमुनाबाट घर जाने क्रममा गोरेटो बाटोबाट चिप्लिएर करिब एक सय मिटर तल नदीमा खसेर घटनास्थलमै मृत्यु भएको बताएका छन ।

मृतक रोकायाको सोमबार नै जिल्ला अस्पतालमा ल्याएर पोष्ट मार्टम गरी आफन्त्लाई बुझाएको प्रहरी निरिक्षक नाथको भनाई रहेको छ । बाजुरामा एक साता नवित्दै भीरबाट लडेर तीन जनाको मृत्यु भएको छ । बुढीगंगा नगरपालिका–३ का सौरे नेपाली सोही नगरपालिका–२ नडांगबाट आउदै गर्दा पानीमुलको खोलाको बाटोबाट लडेर मृत्यु भएको हो ।

शनिबार बडीमालिका नगरपालिका–६ कोर्धका धनबहादुर खड्काको फणिल्ला भीरबाट लडेर गम्भीर घाइते खड्काको उपचारमा ल्याउदै गर्दा आइतबार दिउसो मृत्यु भइसकेको हो । अकालमै एक साता नवित्दै तीन जना युवकले ज्यान गुमाएका छन् । उनीहरुको मृत्युपछि श्रीमती र छोराछोरी बेसहारा बनेका छन् ।